清明节，蜻蜓仔跟咗爹哋妈咪返英德。本来妈咪开始话唔带蜻蜓仔返既，不过后来舅父打电话来话好挂住蜻蜓仔，话如果唔带蜻蜓仔返既话，妈咪都唔好返啦！哈哈，妈咪吃醋啦！妈咪话舅父，有咗细既（蜻蜓仔）就唔要大（舅父既妹妹——即系妈咪）既！

      外公外婆好耐冇见蜻蜓仔啦！返到去个个都争住抱蜻蜓仔啊！舅母就唔系好敢抱蜻蜓仔啦,因为源源表哥会吃醋啊。不过，舅母煲咗粥仔俾蜻蜓仔食，仲装咗张床仔俾蜻蜓仔系度玩。张床仔里边放咗好多玩具，好好玩啊！蜻蜓仔好中意喺度玩！不过……源源表哥总系要同蜻蜓仔争嘢玩，哼！我哭！！！外公话，表哥同蜻蜓仔咁样，就系舅父同妈咪细时既翻版!因为舅父细个时都系好中意故意整哭妈咪既！但系，其实舅父又好锡妈咪既喔。

     仲有啊，原来源源哥哥好中意蜻蜓仔既裙仔既喔，舅母都好想将源源哥哥打扮成女仔，因为成日见到啲可爱既裙仔，都好想买。所以，舅母就俾蜻蜓仔既裙仔俾源源哥哥试下，点知，源源哥哥穿咗上去之后，竟然唔肯脱落来了，哈哈，到睡觉先肯脱，哈哈，笑死妈咪啦！

      住咗两日，爹哋妈咪要返中山啦，虽然外公外婆好唔舍得蜻蜓仔，但系都系要分开既啦，临返前一晚，舅母仲买咗套衫仔同裙仔俾蜻蜓仔添，(*^__^*) 嘻嘻……！舅母真系好锡蜻蜓仔啊！多谢舅母！

      唔知又要几时先返英德啦，妈咪话放暑假带蜻蜓仔返去英德玩既，不过，妈咪暑假都唔知放唔放假，哼！大人讲嘢要算数啊！