俗语讲，“男子汉大丈夫流血不流泪”。爹哋好明显就系一个“男子”，亦都早就系妈咪既“丈夫”，但系仲未敢称“汉”认“大”。至于流血同流泪方面，爹哋系唔惊流血既，适当流血亦都对身体有益，不过冇事就最好唔乱流啦；爹哋亦唔在乎流泪，适当流泪亦都对身体有益，伤感既时候就会自己匿埋喊。

其实，头先句俗语系一个男人硬正既表现。讲到硬正，爹哋妈咪都好硬正，不过两个又有小小区别。相同既系，爹哋妈咪系外人面前都好硬正，好少俾人知道自己唔开心。唔同既系，爹哋系外人面前对自己硬正，对外人既态度有时比较软弱，伤感时好易系熟人前崩堤；而妈咪系外人面前对咩人都硬正，伤感时通常只会自我崩堤，唔会殃及其他人，最多只系爹哋呢条“池鱼”遭殃。

讲咗上面一大堆，只系想讲：爹哋近日崩咗堤。

今朝医生检查到蜻蜓仔既黄疸指数增加咗，有成29咁高！查咗吓蜻蜓仔既血型，系B型，推测可能系溶血黄疸，建议转新生儿科治疗。爹哋交咗按金之后先知道，蜻蜓仔要一个人系噶边隔离治疗3-5日，由噶边既姑娘照顾。唸到蜻蜓仔啱啱先出来几日就要同爹哋妈咪分开（虽然只系几日），但系爹哋已经好唔开心，过咗一阵就崩堤啦（崩咗一阵）。之后，睇蜻蜓仔游水时又眼湿湿。游完水后，爹哋推蜻蜓仔返妈咪身边之后，又崩咗一次，呢次吓到婆婆脚都软晒，以为蜻蜓仔既情况好严重。送完蜻蜓仔过新生儿科返来之后，爹哋既心情变得更差，脾气亦都大咗，到爷爷、嫲嫲、婆婆返屋企，净返爹哋妈咪既时候，爹哋既堤终于彻底崩溃……蜻蜓仔一早已经成为爹哋生命中不可或缺既一部分。

下午去睇蜻蜓仔既时候，见到佢只系着咗块纸尿片静静咁训系一个仪器入面一边吊针一边照灯，双眼用块黑布蒙住，四只手脚既踭上都贴住线头，身体既肤色似乎比一般人黄。

蜻蜓仔唔系身边既时候，周围变得好静，尤其系晚黑，静到好空虚。

蜻蜓仔，你要快啲好番，返来爹哋妈咪身边。

后记：

    写得太长，争啲就唔记得要写既嘢。呢篇博客之所以叫《血与泪》，系因为医生话黄疸如果太严重既话要输血，爹哋系一个会晕针既人，打完针冇几耐就会见晕。但系，如果蜻蜓仔真系严重到要输血既话，爹哋就算晕都要试。