今日天气竟然回暖（近年天气真系乱来），训晏觉时妈咪唔知做咩异常兴奋，仲要同蜻蜓仔影裸照！之前爹哋已经趁蜻蜓仔冲凉时帮蜻蜓仔影过全裸啦，不过当时光线唔够，爹哋技术又唔好，所以效果一般。

讲返妈咪既疯狂行为。妈咪讲完之后，都未经过蜻蜓仔同意（想反对都冇办法），一下就剥晒蜻蜓仔既衫裤，净番块纸尿片，然后要蜻蜓仔坐系度影，又唔俾爹哋入镜。蜻蜓仔而家先得四个几月，自己一个点坐啊？冇办法！爹哋唯有系后面扶住蜻蜓仔，自己用张被遮住自己。但系妈咪又嫌爹哋既手抢镜，爹哋只有用一只手顶住蜻蜓仔既背。点知蜻蜓仔成个人向前倾，即刻顺势来咗个四脚爬爬。吓死爹哋！几惊蜻蜓仔拗到手。点知蜻蜓仔乜事都冇，仲用个肚仔顶起自己，手手脚脚好兴奋咁系空中乱划。妈咪见到咁仲兴奋，博命咁影蜻蜓仔……影完之后，妈咪仲好唔满足，誓言要等蜻蜓仔识坐时再影一次。

唉！蜻蜓仔，以后一定要孝顺啊！如果唔系，小心妈咪拿你啲裸照来要挟你啊。