爹哋妈咪终于放寒假啦，妈咪兴高采烈咁话带蜻蜓仔返外公外婆屋企，话外公外婆好挂住蜻蜓仔，其实蜻蜓仔都好挂住外公外婆，仲有源源表哥啊！返到去就可以同表哥仔玩啦！唸到都开心啊！

爹哋妈咪买咗好多嘢唸住送俾源源哥哥既，点知等爹哋妈咪准备好车时，天气开始好冻啊！蜻蜓仔好怕冻既！外公就打电话俾妈咪，话英德好冻啊，第二日会更加冻，爹哋妈咪就话唔怕，但系蜻蜓仔咁细应该顶唔顺既。而且听讲京珠高速好似塞车，睇吓天气转暖再返。

就系咁，一日等一日，蜻蜓仔等到颈到长啦！天气仲一日比一日冻，爹哋妈咪仲话，好在冇坚持返啊，如果唔系唔知会唔会好似电视新闻上面讲既个啲困系高速公路上面既叔叔阿姨咁，又冇嘢食又冻，好惨啊！

不过，蜻蜓仔真系好想返外公外婆度啊，因为蜻蜓仔好久冇返啦！虽然外公外婆经常来中山探蜻蜓仔，但系太婆行动唔方便，来唔到中山，就见唔到蜻蜓仔啦！妈咪话旧年妈咪都冇返过外公外婆度，好想返去一家团聚，上次外公话想过年影张“全家福”，而家，哎！睇吓过咗年可唔可以返去啦！

妈咪话妈咪细个系太婆带大既，读大学时又冇点陪到太婆，毕业又要工作……妈咪好想陪一吓太婆。蜻蜓仔大个咗都要陪多啲妈咪同嫲嫲！哈哈！做个孝顺既孩子！