我的个人资料
| 姓名：廖子峰 | 小名：宝宝 | 性别：男孩 | |
|
十月怀胎，一朝分娩!我噶预产期系2007年5月27号，原本我都以为我会提早生BB，因为身边有部分认识噶准妈妈朋友预产期都系5月份，而佢哋分别都提早咗生BB，搞到当时我都有D心急，但我知道BB想几时出世系会有佢自己噶意思的，所以到5月下旬，我就尽量食D自己想食噶嘢作为最后冲刺，因为坐月期间有好多嘢都要戒口。 5月28号晚，系BB系妈咪肚里面满40周（足月）啦，果晚我同老公决定第二日就去产检，睇下BB情况如何，果晚我仲有行楼梯(8楼啊)，跟住饮咗一罐我成个怀孕期间都未饮过噶汽水：雪碧，仲要系唔冻噶，点知5月29号果晚瞓到点几钟，个肚就开始好痛，系要大大果只痛，BB仲踢得好犀利，我有D担心，系咪BB要出世啦？跟住返上床谂住睇多阵情况如何先再决定，瞓到3点几，个肚仲系想大大果种痛，跟住再去厕所，点知大大就无啦，见红了！即刻入房叫醒老公，叫醒我妈咪，但个肚仲未开始真正宫缩噶痛，所以大家决定系屋企等下先，到朝早7点几，开始嚟料啦，宫缩痛啦，就冲凉洗头，妈咪煮咗碗好正噶鸡蛋烧鸡亦饭吡我食,9点几老公同妈咪就出发同我去医院（中山一院）啦。去到医院医生首先同我做胎监，发现有宫缩但唔够力，由于我已经孕40周加二天啦，随时都生得，医生要我入院观察，果一晚我就住系10楼孕妇区等待，果日下午我仲照咗次临生BB前噶彩超，医生估重BB有差唔多8斤，我好担心要剖腹，仲有胎盘已经3度钙化，唔能够再拖啦，其他各样指标都正常。果一晚我老公系最辛苦嘎，因为中山一院噶制度比较严，家属唔能够陪过夜，仲要限定时间探访。我老公果晚自己一个系一楼急诊区外面D凳度陪我，我妈咪同奶奶就返东山屋企准备好一切，老公时不时就打我手机问我宫缩情况如何，一直见红，有宫缩但始终唔够力。后来瞓到5月30号下半夜凌晨4点几，开始好有规律咁十几分钟就痛一次，果种痛我系完全可以忍受，我等咗一阵就按铃叫护士，佢同我又做胎监，发觉宫缩有规律就即刻转我上去11楼待产房，我打吡老公，佢都即刻上去11楼，入咗待产房就无得吡家属探访啦，我揽住老公，好惊再见唔到佢（而家发觉自己咁谂好傻）入咗待产房，仍然系等，早上8点左右，我行出去待产房等候区，我妈咪奶奶同老公都系度等紧我，一见我出嚟就即刻吡早餐我食，好感动...入返待产房之后，医生查完房就建议我滴缩宫素帮助宫缩，我开头点都唔制，因为同房噶隔离床果位准妈妈滴咗一日都无效，最终都系要去剖腹。我唔想有咁噶下场。轮流几个医生助产士最后加埋我D屋企人劝咗好耐，终于到下午两点，我同意滴缩宫素催产，因为我唔想BB系我肚里面拖得太耐会缺氧，而且我老公发咗一条令我好感动噶短讯：“希望你能珍惜这次生小孩的机会，但愿你能够一个人完完整整地生活（唔想你选择剖腹产吡人戒一刀），更希望刚才医生跟你说的话，三思三思，这一定是你人生的转折点。”我唔想令任何人失望，我要坚强！5月30号下午两点钟我开始滴缩宫素，滴到差唔多4点我忽然痛得好犀利，又急大大又急细细，有个助产士帮我检查开指：“哇，咁快开两指啦？！”跟住即刻要我入产房啦，佢问我需唔需要温馨陪伴分娩，我话要，佢就带我入去一院唯一一间温馨陪伴分娩室度准备分娩。（而家谂返都几好彩，唔使预约都有温馨陪伴）我即刻打电话吡老公，佢原本仲谂住返东山屋企瞓一阵，点知D缩宫素咁快就见效，收到电话老公即刻又返返嚟医院，我系5月30号下午4点左右入温馨产房，老公一直陪住我，宫缩越嚟越密，当然就越嚟越痛啦，但我依然忍住无叫到出嚟，接生医生同助产士纷纷准备好一切，过咗个几钟，越嚟越想大大同细细，医生再检查，已经开到8指，再过无几耐，我同老公讲我顶唔顺啦，真系要大大同细细，忍唔住啦，老公即刻叫医生，佢哋再入嚟帮我检查，已经开晒十指啦！医生话准备好一阵宫缩一痛就用力，呢个时候医生要我老公暂时回避下，出去等，帮我接生噶医生同D助产士都好好人，知道我后生，讲好多说话支持同帮我，就系咁，用咗好几次力（系BB个头仔即将要出嚟噶时候，助产士仲喂我饮红牛同食咗两粒金沙朱古力）系大家共同努力下，最后一次用力，BB就出世啦，医生望下时间，跟住宣布BB出世时间，前后一共用咗大概3个几钟，医生笑住同我讲:“唔使再用力啦，你好叻女啊！生咗个仔仔！”我好开心，不停咁抓住身边其中一个助产士噶手讲：“我个BB啊！我个BB啊！”医生宣布BB出世时间同磅体重，呢个时候医生又开门放返我老公入嚟啦，开心得佢啊！对住我双手竖起大拇指跟住就系胎盘娩出同缝针啦，都唔觉得痛啦！最痛噶经已过去啦。助产士抱BB吡我亲亲!搞掂晒一切之后，我同BB仲有老公一家三口就系温馨分娩室度“温馨”两个钟，再推出产房。我真系好叻啊，一滴眼泪都无流过,赞下自己先！系产房外面等候噶有我爹Di妈咪，奶奶同BB噶契爸爸（老公噶契大佬）BB就放系我只脚仔度，周身踢。 十月怀胎，一朝分娩，我终于勇敢顺利诞下我的猪仔小王子！升级做咗妈咪！原来真系足月BB系唔同D，系妈咪肚里面一日等于出世一星期。屋企个个都升晒级啦！我要学做个称职噶好妈咪，BB系我同老公的心肝宝贝！亲亲！ 坚持就是胜利！要相信自己！ |
|||