| 姓名：梁筱璇 | 小名：蜻蜓仔 | 性别：女孩 | |
|
呢一日系妈咪呢一生最难忘亦系最痛又最幸福既一日，一切都源于妈咪既宝贝——蜻蜓仔！ 7月17日凌晨大概三点，妈咪既肚一阵阵痛，早上妈咪去厕所先发现有血，话俾嫲嫲知，先知道呢啲就叫做“见红”（即系BB准备出世）。于是就急急忙忙执嘢去医院（唔知系米太急了，都好似无咩感觉）。去到医院之后除咗隔5-6分钟就会隐隐作痛之外就系漫长既等待……（心情系又期待又紧张） 到咗晚黑，都仲系间中痛（可能就系蜻蜓仔正系度努力钻紧出来）。因为成晚咁痛，妈咪根本睡唔着，而且仲吵埋训系隔离既爹哋添（个时真系好想蜻蜓仔快啲出来，早啲结束呢种痛苦）。 终于都天光啦，爷爷嫲嫲6点几就过来嘞，妈咪都仲系痛，而且冇胃口食早餐，只系食咗少少粥，医生问妈咪想顺产定系剖腹产，妈咪觉得可以顺产就顺产啦（其实妈咪咁娇小，外公外婆一直都叫妈咪剖腹产，因为佢哋好担心妈咪受唔到咁既苦）。妈咪太自信啦，觉得自己平时系个运动健将，一定可以既，点知…… 于是，8点几姑娘就推咗妈咪入产房啦。入产房就觉得无咩感觉，上到产床就觉得恐怖啦。医生检查先开咗一公分，距离10公分仲有好远啊。于是又系等！呢个时候既等同寻日既等系唔一样，因为今日更痛更难受。等到11点几，都仲系无咩进展，于是医生就同妈咪打咗催生剂。哇！真系犀利！痛既间隔时间短咗，痛既程度又大大加重咗，真系好难顶啊！妈咪开始顶唔顺啦，于是就开始呻吟，姑娘叫妈咪深呼吸，唔可以叫出声，但系个种痛系冇办法唔叫出声架。接落来更加难以忍受，形容一下——（哎呀，原来妈咪稳唔到贴切既形容词喔）。总之，一个字——痛！三个字——我想死！四个字——生不如死！ 都唔知过咗几耐，妈咪终于忍唔住同医生大叫：“医生啊，我唔得啦！！！我要剖腹产啊！”医生梗系唔理妈咪啦！（妈咪心里边唸，点解啲医生咁冇人性既！）最终，医生都系冇理妈咪，净系不断咁警告妈咪：你要忍住啊，千祈唔好出力啊，如果唔系会导致肛裂架！ 都唔知姑娘投诉咗妈咪几多次——唔好大声叫啦！终于生咗，不过，唔系妈咪，系隔离床既产妇啱入来冇几耐，叫都冇叫声就生咗啦，生咗个BB女，过咗冇几耐，另一个医生话:“而家俾你出力啦，先屙清啲嘢先。”于是妈咪就按医生教既方法出力，原来咁样系舒服过啱先唔俾出力架。出力唔够一分钟时间，医生就话：“出来啦，见到头仔啦，唔好出力先啊！（原来医生仲未做好准备）”妈咪又忍咗忍，等医生准备好啦，几秒钟就见到“血淋淋”既蜻蜓仔啦。妈咪已经半昏迷状态了，再加上妈咪冇带眼镜，睇唔清楚，于是医生就将蜻蜓仔抱到妈咪既胸前，将蜻蜓仔既脸贴系妈咪既胸前（呢个系蜻蜓仔同妈咪既第一次亲密接触，妈咪好累又好开心又好欣慰……百感交集啊！） 终于都生咗啦！第一时间拿起床边既电话：“喂，老公，生咗个女啊！” |
|||