呢个空间既名已经由“BB的共享空间”变成“蜻蜓飞处”。所以，以后呢个空间主人既称呼亦会由“BB”变做“蜻蜓仔”（识得爹哋妈咪既人应该比较容易理解，唔识得既人如果唔理解，亦都冇需要理解。反正，以后呢个空间主人既呢称就叫“蜻蜓仔”）。琼瑶有本小说《海鸥飞处彩云飞》，《月光宝盒》入面既春三娘话“梅花飘处，寸草不生”，咁我哋既“蜻蜓飞处”后面可以接咩呢？爹哋仲未捻到。曾经捻过用“了无痕”，但系仲想捻啲意味深长啲既（扮吓有学问），所以暂时未定。
不过，话讲番转头，开讲有话“唔怕生坏命，最怕改坏名”（爹哋虽然觉得爹哋妈咪个名唔算十分好，但系至少夹啊，就好似爹哋妈咪个名既最后一个字咁。另外，爹哋妈咪个名中间个字其实都几fresh吓）。所以，对于“蜻蜓仔”个名，爹哋妈咪用咗好多时间，捻咗好多个钟意或者有深刻含义既字，但系到而家都未决定。训晚，半夜妈咪有段时间唔舒服醒咗又系度捻名，佢捻起训晚电视入面有个人叫“硕”，佢话呢个名几好听，于是就捻到“荆硕”呢个名（呢个名其实系佢话个“硕”字好听时，爹哋已经即时捻到啦，只系当时冇讲。咁就证明咗，妈咪同爹哋心灵相通之余，都几反应迟钝）。“荆硕”呢个名爹哋都觉得几好。当初爹哋希望如果系男仔就用个“荆”字，系想“蜻蜓仔”可以系荆棘丛中成长。而家多个“硕”字，就更想“蜻蜓仔”系荆棘丛中硕果累累。
“蜻蜓仔”，如果话爹哋妈咪系想你有后一个字既成果，其实系更想你先经历前一个字既磨炼。
后记：
事实证明，“蜻蜓仔”（或“小蜻蜓”）呢个名大受好评，爹哋妈咪有啲朋友同事仲以为呢个系真名，有啲仲为“蜻蜓仔”唔系真名而扼腕痛惜（夸张）！
