寻日妈咪仲话蜻蜓仔好耐冇郁，惊唔知会唔会有事（听得太多可怕既案例啦），寻晚蜻蜓仔就好似想叫妈咪唔使担心咁，整到妈咪好唔舒服。今朝一大早仲俾咗啲颜色妈咪睇（蜻蜓仔：咩颜色啊？妈咪：红色。）。然后就成家人忙住执嘢去医院，随时准备住院。后来去到医院，医生真系叫妈咪入院。可能今晚或者听日蜻蜓仔降临。
系之前都有同事问爹哋：“就黎做爸爸，紧唔紧张，兴唔兴奋啊？”爹哋一律say no，但系多数人都唔信。其实，呢啲系爹哋性格来既。爹哋好似好多嘢唔真正打到埋身，都唔会紧张咁，而且紧张感亦唔会持续太耐。就好似考试同比赛咁，之前爹哋都可以当冇一件事，到临开始之前就会特别紧张，会震，但系一旦开始之后，爹哋个心就只会捻住全力以赴，唔会再惊。今日都系咁。妈咪话睇到颜色时，爹哋仲自己顾自己咁食早餐，系嫲嫲一个人系度急；截唔到的士时都唔紧张。到要交订金入院时先开始有小小紧张；妈咪入产房检查时，爹哋竟然有种莫名其妙既兴奋；后来，长时间既等待令爹哋百无聊赖，并伴随住肚饿……到而家，22点47分，蜻蜓仔仲系妈咪个肚度每13分钟左右骚动一次既时候，爹哋仲成个大作家咁系妈咪身边写紧呢篇博客。
