蜻蜓仔识“揸车”啦！

      之前大家都见到蜻蜓仔既第二部私家车既出现，当时，蜻蜓仔仲系脚未到地既（因为有一层承脚既布），后来，爹哋拆咗个块布，睇蜻蜓仔识唔识行。点知，蜻蜓仔脚一到地就出力一蹬！整部车就向后退。哈哈，傻猪仔，净系识向后退，完全冇方向感。

      咁既情况持续咗好一段时间，后来，竟然“打横行”，成个蟹仔咁，哈哈！前几日，蜻蜓仔终于识向前行啦，而且，而家已经醒目到只要一见到想用手去摸既目标，就会行过去目标所在地啦。

      今日仲好笑，同样，蜻蜓仔坐喺车仔度，爹哋用可乐罐引蜻蜓仔，蜻蜓仔最中意红色，一见到即刻就伸手去拿，点知唔够高，哈哈！醒目既蜻蜓仔居然跳起身去拿，真系精彩啊！

      蜻蜓仔学识“揸车”之后，屋企既台面就唔可以放嘢啦，因为蜻蜓仔好多手既！一日到处摸，听嫲嫲话蜻蜓仔连垃圾桶都中意玩，就算“拖车”走，过一阵又行埋去再玩,真系冇佢符。

      不过，妈咪真系担心蜻蜓仔会拿到啲危险既物品，到时有咩损伤，妈咪会好心痛既！