2008年3月8日凌晨6点，蜻蜓仔睡系妈咪既怀抱最后一次食妈咪既奶奶！

     蜻蜓仔已经7个月零19日大啦，本来，蜻蜓仔唔使咁快断奶既，因为蜻蜓仔既牙仔，要被逼断奶。前面讲到蜻蜓仔中意咬妈咪，其实，妈咪已经可以控制到蜻蜓仔唔咬妈咪了，但系，唔知点解，妈咪既奶头居然又被蜻蜓仔整损咗，奶头损咗之后，妈咪停咗一晚无俾伤咗个边既奶头俾蜻蜓仔食，第二朝妈咪就开始涨奶，妈咪好痛，但系又惊会冇奶俾蜻蜓仔，不得不忍痛俾蜻蜓仔继续食，晚上既时候，妈咪一边喂蜻蜓仔食奶奶，一边不断咁叫，仲不断咁流眼泪，蜻蜓仔都知道妈咪好痛……

     第二日，妈咪仲系胀痛，不过，已经比之前好咗好多了，起码冇咗咁涨啦。妈咪话，蜻蜓仔又可以继续食啦。点知，到咗晚上，妈咪洗完澡之后，竟然话奶头发炎了，仲话发炎唔可以俾蜻蜓仔食，后来，妈咪就用奶头套套住奶头来俾蜻蜓仔食，但系，蜻蜓仔好醒目，一见到系奶头套就摇头唔肯食，仲猛咁喊，妈咪真系冇办法啦！

     妈咪就同嫲嫲商量，都系决定同蜻蜓仔断奶。因为妈咪上班既缘故，白天既时候，蜻蜓仔只系食两三次奶，主要系食粥仔。所以，要蜻蜓仔白天一日唔食奶奶系好容易做到既，主要系晚上。

     到咗晚上，蜻蜓仔食饱咗粥仔，嫲嫲就背住蜻蜓仔睡觉。喱个时候，妈咪已经胀痛到好难忍受既地步。上咗床准备睡觉，但系点都睡唔着，因为痛，仲因为从来未试过冇蜻蜓仔睡喺身边，好挂住蜻蜓仔！直到12点几，听到蜻蜓仔既喊声，爹哋睡到叱晒鼻鼾，好吵，妈咪想听清楚喺楼下既蜻蜓仔仲哭唔哭，心急之下大力拍爹哋，点拍都唔醒，不过，鼻鼾声停咗。听吓，蜻蜓仔都算乖乖，哭咗一阵，食饱咗又睡咗啦！

      凌晨4点，蜻蜓仔又醒咗啦，今次，哭咗比较耐，妈咪仲听到爷爷喺度哄蜻蜓仔笑，搞咗好耐，蜻蜓仔既声先停咗，大概都睡咗，妈咪又再睡……冇几耐，妈咪又再胀痛到醒咗，直至天光。

      就系今日早上啦！虽然系星期日，但系妈咪都仲要上课，妈咪煲咗山楂麦芽水来喝，（听讲可以回奶）但系，似乎作用一般，因为妈咪都系觉得痛……

      而蜻蜓仔今晚又要经过一次考验，过咗今晚，蜻蜓仔应该可以断奶成功了呱！不过，有一个好大既问题，蜻蜓仔唔肯喝奶粉，咁样半夜就好麻烦，而且，妈咪担心蜻蜓仔会唔够营养。

      断奶，对于妈咪同BB来讲，都系一次好大既难关同考验，妈咪会同BB一起努力通过……